Андеша ва табрикот: Дар бобати Рӯзи байналмилалии ҳифзи кӯдакон

Санаи 1-июн дар тамоми миқёси дунё, рӯзи байналмилалии ҳифзи кӯдакон таҷлил мегардад!

Кӯдакон бузургтарин сарват, нури чашм ва ояндаи дурахшони ҳар як оила, ҷомеа ва давлатанд. Ин рӯз танҳо як ҷашни оддӣ нест. Ин рӯз барои мо, калонсолон, як занги бедорсозӣ ва хотиррасонӣ аст. Он моро вазифадор мекунад, ки дар баробари насли наврас масъулиятшинос бошем.

Ҳифзи кӯдакон танҳо бо таъмини онҳо бо хӯроку либос маҳдуд намешавад. Вазифаи асосии мо — фароҳам овардани шароити хуби таълиму тарбия, ҳифзи саломатӣ ва сохтани як муҳити бехатару пур аз муҳаббат аст. Мо бояд кӯдакони худро чунон тарбия кунем, ки онҳо соҳибилм, ватандӯст ва инсонҳои солеҳ ба воя расанд.

Давлату ҳукумати мамлакат таҳти роҳбарии Пешвои миллат барои рушду камоли кӯдакон ва наврасон тамоми шароитҳоро муҳайё сохтааст. Аммо саҳми ҳар як оила ва мактаб дар ин роҳ калидӣ мебошад. Мо бояд ба кӯдакони ятим, маъюб ва ниёзманд таваҷҷуҳи бештар зоҳир кунем, то онҳо худро танҳо ҳис накунанд.

Кӯдакон  табассуми ин дунё ҳастанд. Онҳо бояд кӯшиш кунанд, ки хуб хонанд, илм омӯзанд ва соҳиби касбу ҳунар шаванд. Ояндаи ин Ватани обод дар дасти онҳост.

Бори дигар ҷашн муборак, соҳибони ояндаи мо! Бароятон хотири ҷамъ, саломатии бардавом ва даврони кӯдакии хушбахтонаро таманно дорам!

Раиси Суди шаҳри Норак                                                                                                                          Ҳамдамзода А.В.